ТҮРКІСТАН ОБЛЫСЫНДА «БӘЙДІБЕК АТА» СУ ҚОЙМАСЫ САЛЫНАДЫ
Еліміздің Су ресурстары және ирригация министрі Нұржан Нұржігітов көктемгі егіс науқанына байланысты Түркістан облысының Жетісай және Мақтаарал аудандарын аралап, шаруалармен кездесті,- деп хабарлайды «Қалам.кз» порталы облыс әкімдігінің баспасөз қызметіне сілтеме жасап.
Жиында Нұржан Нұржігітов Түркістан облысында «Бәйдібек ата» су қоймасы салынатынын айтты. Министрлік құрылысты осы жылдың соңына дейін бастауға ниетті екенін жеткізді.
Сондай-ақ облыста суарудың үнемді жүйелерін дайындаумен және орнатумен айналысатын өзбекстандық OMAD Start компаниясының зауытын салу жоспарланып отыр. Бұл туралы шаруалармен кездесуге қатысқан кәсіпорын басшысы Шахобиддин Каромов мәлімдеді.
Нұржан Нұржігітов «Қазсушар» мемлекеттік кәсіпорнының жергілікті филиалының жұмысы туралы баяндаманы тыңдаған соң шаруалардың сұрақтарына жауап берді. Атап айтқанда, шаруалар Шардара су қоймасынан «Достық» магистральдық каналына дейін су жіберетін машина каналын жөндеуге, өңірдің ирригациялық каналдарын реконструкциялауға, бетондауға және тазартуға, Арал теңізін қалпына келтіруге, ИДЖЖ-3 жобасына (ирригациялық және дренаждық жүйелерді жетілдіру) қосымша объектілерді қосуға және жекелеген каналдар бойынша су бағасының айырмашылығы туралы сұрады.
Сондай-ақ шаруалар «Қазсушар» мемлекеттік кәсіпорнын жетілдіру және стратегиялық маңызы бар нысандарды республикалық меншікке қайтару жөнінде ұсыныстар айтты.
Кездесудің ресми бөлігі аяқталғаннан кейін Нұржан Нұржігітов азаматтарды жеке қабылдады. Қоғамдық қабылдауда «Қазсушар» мекемесімен келісімшарт талаптары, су ресурстары мониторингінің жерсеріктік технологияларды енгізу және суару арналары бойында сорғыларды орнату сияқты тақырыптар талқыланды.
«Мәселелердің негізгі бөлігі каналдар мен басқа да гидротехникалық құрылыстарды жөндеу мен реконструкцияға қатысты екенін түсініп отырмын. Біздің министрлік ұзақ жылдар бойы жинақталған күрделі мәселелерді кезең-кезеңімен шешуге ниетті. Халықты біздің жұмысымыз және бастамаларымыз туралы уақтылы хабардар ету үшін министрлік, «Қазсушар» және жергілікті атқарушы органдар арасында тығыз байланыс орнату өте маңызды. Осы кездесуге уақыт бөліп келгендеріңізге көп рахмет. Вегетация маусымы басталғаннан кейін суару жұмысының барысымен танысу үшін Түркістан облысына тағы келемін», деді Су ресурстары және ирригация министрі Нұржан Нұржігітов.
Пікір жазу
